Thursday, October 5, 2017

දෙසීයට ගණින්නං මං මගෙ අම්මේ!

(ශිෂ්‍යත්ව විභාගයේ ප්‍ර‍තිඵල පිට වූ පසු මවක් වෙත ලැබුණු කවියක්!)

පහේ කණිසමට නිදිමත මරාගෙන
ඉහේ පෙරවනය විසිකොට දමාගෙන
හිතේ දුකින් පොත ඇස යට තියාගෙන
ඔහේ උන්න අම්මේ මම බලාගෙන

බිම කළුවර මැකී ලොව මතුවෙන්න කලින්
ඉර මාමගෙත් නිදිමත නැතිවෙන්න කලින්
ඇඳෙන් බිමට මා ඇද දැමූ නුඹේ හඬින්
ඇස ඇරුණේ පොත උඩ නැටු අකුරු හැඩින්

සීයෙන් සීය ගන්නට මට කිව් අම්මා
සීයේ අගය ටිකකින් පැත්තක දැම්මා
සීය අගට තව ලොකු අගයක් නම්මා
දෙසීයක් අරන් එන්නැයි කිව් අම්මා

පිට්ටනියේ බෝල බැට් ටික වල් වැදුණා
සෙල්ලම් බඩු ගෙදර මුළුවල දැල් බැදුණා
යාළු මුළු සැවොම තරගෙට බැඳ තිබුණා
ආසා නැතත් අපි ටික පිටියට වැටුණා

කතන්දර පොත් අතර හිටි සුදු හා පැටියා
මිදි වැලකට උඩ පැන නැටු අර නරියා
දිවිය ලෝකයට ඉගිලුණු ලොකු අලියා
ආයෙත් මා ළඟට එනකං මං හිටියා

ලොකු ඉස්කෝලයක් මට මොකටද අම්මේ
යන්නට වෙයි නේද නුඹ දමලා අම්මේ
ලකුණු අඩු වෙලා නෑ නාඩන් අම්මේ

දෙසීයට ගණින්නං මං මගෙ අම්මේ!

Thursday, September 28, 2017

Just a small place before Nirvana

(Translated by Missaka Hettiarachchi)

Being not much
Of a “believer”, as such
But I too
Have prayed for a thing or two

For me, nothing was “god given”
Often a skeptic of heaven
But I too
Have prayed for a thing or two

When mom’s health fell
And dad’s death befell
The agnostic could not bear
And pined for “God” to appear

Even God might ponder
"IF" he commands heaven and yonder
“Contemptible vacillation”
He may think with abomination

But, again today
My mind yearns for a pray
As, Mom too has gone
Following dad, never to return

No, not anything big O Lord
Not for their return, I seek your accord
That never really crossed my thought
As I know it’s not a duty that you ought  

One small thing, no other
Can you arrange this for our mother?
A small place before nirvana
A big help O Lord, “a small place before nirvana”

Her small booklets
With short poems scribbled
Worn old magazines
Which she merrily ruffled

May be a small radio
If that’s not a big hassle
For Monday night’s audio
I’m sure she will be thankful

Yes, I mean it
Not Nirvana itself,
Just a small place before it  

As time flows without cease
Crowds would fill Nirvana indeed 
Mom would never find peace
Being a mom and many mouths to feed

In her years and decades many
Not a day has passed quiet, not any
So not nirvana Lord, “just a small place before”
With that simple peace and quiet, she would adore 

නිවනට මෙපිට පොඩි තැනක් හි ඉංග්‍රීසි පරිවර්තනය

Thursday, September 7, 2017

නිවනට මෙපිට පොඩි තැනක්!

මොනම දෙවියෙක් ගැනවත්
විශ්වාසයක් ඒ හැටි නැතත්
මමත් ඉහිට යම් දේ ඉල්ලුව
ලැබෙයි කියල අදහසක් නැතුවත්

මේක නම් දෙවියො දුන්න කියල
හිතිල තිබුණේම නැතත්
ඉල්ලපු වාර තිබුණ දෙවියන්ගෙන්
ලැබෙයි කියල අදහසක් නැතුවත්

අම්ම ලෙඩ වෙනකොට
තාත්ති නැති වෙනකොට
අවිස්වාසෙ පැත්තක දාල
හිතුව තමයි ඇත්තටම
දෙවියො දැන් ආවනම් කියලත්

දෙවියන්ටත් පුදුම ඇති
ඉන්නව නම් කොහේ හරි
මගෙ මේ දෙබිඩිකම
බණිනවත් ඇති පිස්සු කියලත්

අදත්... ඉල්ලන්න හිතෙනව
තාත්ති විතරක් නෙවෙයි
නැති හින්ද අම්මත්
ආයෙම නොඑන්නම ගිහින් ඇති හින්දත්

මහ දෙයක් නම් නෙවෙයි දෙයියෝ
ඒ ගොල්ලො ආයෙම
ගේන ජාතියෙ බැරි වැඩ
මවන ජාතියෙ විරු වැඩ
ඉල්ලන්න හිතිලම නෑ
නොවෙන බව මම දන්න හින්දත්

එකම එක සුළු දෙයක්
නිවනට මෙපිට පොඩි තැනක්
හදල දෙනවද අපේ අම්මට
කලොත් නම් ලොකු උදව්වක්

ඇගෙ අත් අකුරින්ම කටු ගෑ
අම්මගෙ පුංචි කවි පොත්
සතුටින් පෙරළ පෙරළා උන්
පරණ ශ්‍රී සගරා

තව පුංචි රේඩියෝවක්
තිබුණොතින් නම් ලොකු දෙයක්
ඳුදට මුවන් පැලැස්ස විතරක්වත්
ඇහුණොතින් ඇති නෑ සැකක්

ඔව්...
නිවන නම් නෙවෙයි...
නිවනට මෙපිට පොඩි තැනක්

නිවනට එද්දි මහ ගොඩක්
බත් තම්බලම නිවනක්
නැති වේවි අපේ අම්මට
ඒක මහ කරදරයක්...

අවුරුදුම පණහක් හැටක්
තිබුණෙ නෑ අම්මට නිවනක්
නිවනට මෙපිට පොඩි තැනක්
ඒක වෙයි ලොකු නිවනක්!!!


Saturday, April 22, 2017

මං තවම මේ මෙතැන...


කුස්සියේ ඉදුණු අවුරුදු බතෙහි
සුවඳ මට මේ තවම දැනෙනවා
දොර පියන විවර කර නුඹ ඇවිත්
කමු දුවේ කියනකම් ඉන්නවා

මං තවම මේ මෙතැන අම්මේ...
නුඹ දැන් එතැයි සිතා මම ඉන්නවා

ඈත කොහෙදෝ තැනක හන්දියක
සංගීත සාජ්ජේ ඇහෙනවා
හැමදාම අවුරුද්ද කෙළවරට
යාළුවන් එක්ක නුඹ දුවනවා

මං තවම මෙතැන අයියණ්ඩියේ...
නුඹ දැන් එතැයි සිතා මම ඉන්නවා

වැසී ඇති කවුළු දොර කෙළවරින්
පොඩි උන්ගෙ සිනා හඬ ඇහෙනවා
පොඩි මල්ලි ටිකකට කලින්
කොලු රැළ මැදට පැන්න බව දන්නවා

මං තවම මේ මෙතැන මල්ලියේ...
නුඹ දැන් එතැයි සිතා මම ඉන්නවා

කෙළවරේ කාමරේ සෙනෙහෙ ගෙන
මගෙ ආච්චිත් දොර දිහා බලන් ඇති
ඇවිදගෙන එන්න බැරි බව හැබැයි
ඒ නමුත් මං බත් කවයි හිතන් ඇති

මං තවම මෙතැන අත්තම්මියේ...
බත් එක අරන් එන්න මම ඉන්නවා

හැමදාම කුණු ගඳනෙ මගෙ දුවට
අවුරුද්ද එන නිසා නා ගන්න
මේ සුවඳ සබන් කැට මදි හැබැයි
අර පේන කුණු කන්දෙ ගඳ යන්න

සිනාසී කියා ගිය තාත්තේ...
මං තවම මේ මෙතැන ඉන්නවා...

කවුරු හරි ඇවිත් දොර අරින තුරු
මේ බිත්ති කණු පේලි හරින තුරු
බාල්කය හිස මතින් ගන්න තුරු

අම්මාගේ සුවඳ දෙන බත කන්න
ඒ බත් මිටක් ආච්චිට ගොස් දෙන්න
තාත්තගෙ සෙනෙහෙ ගඟ සිහි කරන්
කුණු කන්දෙ ගඳ යන්න නාගන්න...

මං තවම මේ මෙතැන ඉන්නවා...!


Sunday, October 9, 2016

ෂාෂාෂාෂාෂා...

ෂාෂාෂාෂාෂා....
අටවා ගනිවු මයික් සහ කැමරා
වරෙවු, නැගෙවු, වට කරවු මග අවුරා
අර අන්න අර එකෙක් ගෙල තියයි
අරගනිවු මුල් පුවත් සපුරා

ෂාෂාෂාෂාෂා...
දිව වරෙවු ගෙන හනික කැමරා
හිර කරවු අනුන් මග අහුරා
මේ මෙතන තව එකෙක් ගඟ පනියි
අර ගනිවු මුල් පුවත සපුරා

ෂාෂාෂාෂාෂා.....
උඩ පනිවු අපියි එක ගුගුරා
තව දමවු දුක් කදුළු පහරා
ඉහළ අතු මතින් එල්ලෙයි ඌ
අර ගනිවු මුල් පුවත සපුරා

ෂාෂාෂාෂාෂා.....
බැරිමනම් හංගගෙන කැමරා
දුව වරෙන් කෙළසලා කුමරා
නිරුවතින් අර අතන මළ සිරුර
අරගනිවු මුල් පුවත සපුරා

ෂාෂාෂාෂාෂා....
හෙට මැරෙන කෙනෙක් හෙම ඉඳී නම්
ලයිව් දෙමි ටෙලිකාස්ට් අගෙයි දැන්
ජීවිතේ මරණෙ ගැන කියා දෙන 
අපි තමයි රටේ එක මිතුරා

ෂාෂාෂාෂාෂා....
මේ තරම් අරුම සුරු නිදහසක්
කොයි වෙද්ද අපට හරියන රටක්
ඌරු හඬ නදින් දී ගුගුරා
තලු මරා කුණු සොයමු මිතුරා


ෂාෂාෂාෂාෂා....

ලාලාලාලාලා...

හාහාහාහාහාහා......

......................


Wednesday, July 20, 2016

චාච්චා!


වැඩි හැඩක් නැති අකුරකට
වැඩිය නොඇහෙන හකට
කොයි තරම් පුළුවන් ද
ආදරය කැවන්න

වැඩි රහක් නැති අකුරකට
කවිවල වැඩිය නැති හකට
කොයි තරම් පුළුවන් ද
මේ ජීවිතය යැයි අවන්න

අදත් මහ උදයෙම
නැගීවිත් දුරකථනෙන්
දැනුණා මහරු හැගුමක්
හදවත පුරන සතුටක්

‘ච‘

ඒක තනි අකුරක්
නෑ කිසිම හැඩයක්
චව් චව්‘ ගාල කනකොට
‘චැහ් චැහ්‘ ගානකොට
විතරක් නැගුණු සද්දක්

ඒත්... අද!

ච එක්ක අල් අකුරක්
එක්ක ඇලපිල්ලක්
එකතු වී හැදිලා
චාච්චා කියල සද්දක්

ඒක ලොකු සද්දක්

හුරු බුහුටියට කදිමෙට
‘තාත්තා‘ නොකිව්වට
ශබ්ද හැඩ විමසන
පුතු මුවින් ආ වදනක්

චාච්චා!

ඔව්... හරිම අදරැති වදනක්!!


Monday, April 25, 2016

"සිත් මවමු"



සිත්මවමු - අපට ඉහළින් දෙව්ලොවක් නැත්නම්
පහසුයි මවන්නට අපට අවැසිම නම්
පොළොව පතුලෙහි තැනෙක අපායක් නැත්නම්
ඉහළින්... ඔව්... ඒ අහස් කුස පමණයි...
සිත් මවමු සියලු මිනිසුන්
මේ අද දිනය තුළ දිවිගෙවයි නම්...


සිත් මවමු - රටවල්ය කිසිවක් දකින්නට නැත්නම්
පහසුයි මවන්නට අපට අවැසිම නම්
නසන්නට හෝ නැසෙන්නට කිසිවක්ම නැත්නම්
ආගමක් ලෙස ගැනෙන දෙයක් ලොව නැත්නම්
ඉහළින්.. ඔව්.... ඒ අහස් කුස පමණයි...
සිත් මවමු සියලු මිනිසුන්
සිය දිවිය සාමයෙන් ගෙවයි නම්


සිත් මවන්නෙක් පමණි ඔබ
ඔබ කියන්නට ඉඩ ඇත මට
එනමුත් මා පමණක්ම නොව
ඔබ ද දවසක මවෙත එනු ඇත
සිත් මවනු ඇත
ඉහළින්... ඔව්... ඒ අහස් කුස පමණයි...
ලොවම එක් යායක නැගෙනු ඇත


සිත් මවමු - කිසිවක් කාගෙත් නොවේ නම්
පහසුයි මවන්නට අපට අවැසිම නම්
කුස පෙළන ගින්නට නැවතීමෙ තිත නම්
සොයුරු පෙමකින් මුළු ලොව වැසෙයි නම්
සිත් මවමු සියළු මිනිසුන්
මුළු ලොව එකකු සේ දකියි නම්


සිත් මවන්නෙක් පමණි ඔබ
ඔබ කියන්නට ඉඩ ඇත මට
එනමුත් මා පමණක්ම නොව
ඔබ ද දවසක මවෙත එනු ඇත
සිත් මවනු ඇත
ඉහළින්... ඔව්... ඒ අහස් කුස පමණයි...
ලොවම එක් යායක නැගෙනු ඇත


සෙවණැල්ල - Imagine - ජෝන් ලෙනන්



 සටහන - මෙය සුප්‍ර‍කට ඉංග්‍රීසි ජාතික ගායක ජෝන් ලෙනන් විසින් ලියා ගායනා කරන ලද ගීතයකි. ප්‍ර‍කට බීට්ල්ස් සංගීත කණ්ඩායමේ සම-ආරම්භකයා වූ ලෙනන් මේ ගීය ගයන්නේ එම කණ්ඩායම සමග නොව ඔහුගේ තනි ගීතයක් ලෙස 1971 වර්ෂයේ දී ය. නිකුත් වී ඉතා කෙටි කලකින් ඇමරිකා එක්සත් ජනපදය තුළත් පසුව ලොව පුරාමත් ප්‍ර‍සිද්ධ වුණු මෙම ගීතය ලෝකයේ ඇති සියළු බැමිවලින් මිදී මානව ප්‍රේමය තුළ පමණක් රැදී දිවි ගෙවන්නට මිනිසාට ආරාධනා කරයි.

ගීතය අසන්න - Imagine Song