Saturday, June 29, 2013

කාලයට මම අකමැතියි...



දුවන්නට හැකි වෙතොත්
කාලයේ පසුපසට
මම දුවමි හරියටම
වසරකුත් සතියක් මුලට
හරියටම  හරි දිනට
නුඹේ අවසන් කථන ඇමතුමට

මම කියමි රෝහලට
දැන්ම යන්නැයි කියා
නුඹ පෙළන බඩ රිදුම
පුංචි නොවෙතැයි කියා

කාලය තරම් බිහිසුණු
කිසිත් මම නොදනිමි
යන්න අවසර නැති
කරුණු මම විමසමි...

අවසර තිබිණි නම්
තාත්ති නුඹ තවම මෙහි
සමුගෙන වසරකුත් නොව
සමුගන්න තව කල් ඇති...

(අපේ තාත්ති අපෙන් සමුගෙන අදට වසරකි!)

2 comments:

  1. ඒම දුකකි!
    යාම දුකකි!!
    ඒම, යාම අතර දුකකි!!!

    ReplyDelete
  2. පියා මිය ගිය පුවත
    ලැබ සිත වුවද කම්පිත
    සඟවා කඳුළු නෙත
    මා කියන බස අසන් පිය මිත

    උපන්නොත් මෙලොවේ
    දිනක මරණය හිමිවේ
    මෙය බුදු දහම වේ
    සියළු දේ ලොව නැසෙන සුළු වේ

    එය අවසන නොවේ
    දුක එලෙස නිම නොමවේ
    අප පුතුනට ලොවේ
    දිනෙක මේ දුක් පුවත හිමි වේ

    අප කුඩා කල දී
    හොඳ නරක පහදා දී
    ගුණ දම් කියා දී
    පිය මෙහෙය දෙවි කමට පරදී

    අප උපන්දා සිට
    පියවරුන් කල සේවෙට
    ඇති ණය ගෙවන්නට
    කෙලෙස නම් හැකි වේද අප හට

    දුක් වන්නට එලෙස
    කාරණා නැත කිසි ලෙස
    මා කියන මේ බස
    අසා සැනසෙන් මා මිතුර යස

    ගත් ණය ගෙවන්නේ
    ආපස්සට නොවන්නේ
    පිය නම රැකෙන්නේ
    ඉදිරි පරපුර රැකුනොතින්නේ

    පිය ගුණ සිහි කරමු
    හොඳ දූ පුතුන් සාදමු
    හොඳ පියවරුන් වෙමු
    පියාණන් ණය එලෙස පියවමු

    ReplyDelete